政情：建制以牙還牙 區會狂提規程問題
非建制派佔據全港十七個區議會主導地位，包攬正副主席之位。之不過，唔少建制派區議員都有一定年資，自然識得以牙還牙。尋日喺九龍城區議會會議上演「規程問題」大戰，雙方爭拗聲不斷，甚至連出席會議嘅官員都忍唔住笑！
首項議程已拉開戰幔
戰幔喺首項議程經已拉開，獨立建制派區議員楊永杰提規程問題，質疑身兼民主黨成員嘅該區區議會主席蕭亮聲，喺處理有關「第二次特別會議會議記錄」時，讀漏咗「特別」一詞，更要求秘書聽番錄音，仲話若果係自己錯會道歉。秘書經確認後證實蕭冇講錯，但楊呢番「道歉論」又惹嚟一連串互提規程問題。
會議之後處理對蕭嘅譴責議案，建制派質疑蕭喺之前嘅會議上有裁決失當。蕭離席避嫌，並委託副主席鄺葆賢代為處理呢項議程，但又引嚟建制派提出多輪規程問題，質疑鄺係當時嘅受益者，身份上有衝突，惟議案最終喺鄺主持會議下遭否決。
不過，建制派喺之後嘅議項上繼續提出多輪規程問題，質疑鄺係咪合法主持會議。睇嚟泛民即使控制到區議會，日子都未必真係咁好過！