政情：自助口罩機月底運作 新世界發展惠基層
新冠肺炎疫情近日雖趨向緩和，但市民對口罩嘅殷切需求絲毫未減。新世界發展最近就通過八間非牟利機構，免費派發由集團生產嘅香港製口罩。市民手持「口罩提取卡」，就可以憑卡到十九間設置有「自助口罩提取機」嘅指定中心提取口罩。
新世界表示，首階段計劃將於本月廿五日起，一連十個星期，每星期可憑卡到自助提取機領取一包五個口罩。受惠對象係約一萬二千名正在接受服務人士，當中包括領取綜援人士、獨居長者或單親人士等。
第二階段將擴2萬名額
新世界亦計劃將服務拓展至第二階段，除咗喺各區嘅新一批指定中心增設十八部「自助口罩提取機」，合資格嘅基層市民如領取全額在職家庭津貼、長者生活津貼或傷殘津貼、居於指定中心所屬地區嘅香港永久居民，佢哋可以喺今個月十八至廿二日，向九間非牟利機構嘅指定中心登記，通過審核資格後將獲發「口罩提取卡」，同樣可以連續十個星期憑卡以自助形式提取口罩，受惠人數約兩萬，若登記人數過多，將以抽籤決定。