政情：梁美芬鬧爆兩政策局無能
立法會尋日復會，繼續就《二○二○年撥款條例草案》進行合併辯論，討論由民主派議員所提出嘅五十二項修正案，各位議員就住唔滿意嘅政府部門，建議削減全年開支及發表自己嘅意見。期間經民聯議員梁美芬發言時就連環發炮，鬧爆公務員事務局及教育局，話呢兩個局辦事不力，無所作為。
梁美芬提到，其實好多市民對政策局、公營機構甚至立法會都非常不滿，得警方同醫療部門喺舊年同今年嘅工作量超出預期，表現出色，值得加薪。佢首先點名批評公務員事務局，鬧爆唔少公務員喺舊年反修例期間，用公務員身份帶頭參與反修例活動，包括罷工等，影響社會對公務員政治中立嘅形象，大眾對佢哋整體表現相當失望，又話咁嘅關鍵時刻，應該要扮演定海神針嘅角色喎。
斥讓仇恨進駐小朋友內心
至於教育問題，因最近有小學教師被揭扭曲史實，惹來社會輿論嘩然，校方雖一再致歉仍未平息外界質疑。梁美芬直斥依家嘅老師竟公然歪曲歷史，不能接受。又有學生話聲稱現時係「中佔」時期，完全顛倒歷史，讓錯誤知識及仇恨進駐小朋友內心，梁感嘆，學生對中國歷史知啲唔知啲，老師道德水平又唔符合社會期望。
轟教局軟弱 缺乏阻嚇措施
梁又話咁嘅情況下，教育局竟然長期避而不談，證明局方真係好失敗兼軟弱無能，完全無任何阻嚇措施去應對！最後就提及自己係反對削減學校與內地交流嘅開支，同時促請教職員考慮凍薪，表達心意咁話，又強調無論有幾大分歧，大家都要謹記香港係一國兩制！
早前政府問責班子進行大調動，有五個政策局局長要換人，其中四名局長離任，公務員事務局前局長羅智光就係其中一個被撤換嘅政策局局長，相信都真係做得麻麻地啦。雖然教育局局長楊潤雄就成功逃過一劫，但再係咁嘅表現，難保將來唔會畀人撤換。