中環出更：鄺俊宇被踢出公共圖書館諮委會
繼公文袋議員、內會亂局推手之一嘅郭榮鏗不獲競委會續任後，白鴿黨議員鄺俊宇喺公共圖書館諮詢委員會都無得留低，不禁令人猜疑不獲續任嘅背後原因。其實公職任命，一直都有個不成文嘅「六六規定」，即係唔可以擔任同一個公職六年，同唔可以同時兼任六個公職。郭之前做咗競委會委員兩年就不獲續任，而特首林鄭月娥早前就解畫指決定係用人唯才，但當時都被質疑是否同內會亂局有關，點知事隔唔夠兩個星期，鄺喺公共圖書館諮委會委員只係做咗兩任就無以為繼，唔通民主派都唔係點做到嘢？
未達「六六規定」 出局原因成疑
事緣政府尋日委任新一屆公共圖書館諮委會名單，原本鄺係諮委會委員之一，但就被踢出新一屆諮委會，取而代之嘅成員包括議員鄭泳舜在內共七人。被問到點解無得留低嘅原因，鄺就話「唔使估都知喇」，但佢轉過頭又話「借書都要還喇」、「天下無不散之筵席」咁喎，兜番話依家想專注扶貧同福利委員會嘅工作。
之不過睇番鄺自二○一六年起被委任做呢個諮委會委員，計番距今都係得四年，並無抵觸「六六規定」，但唔知點解鄺就覺得做四年被飛起覺得合理呢？唔止o架，鄺仲話「時間有限、青春有限」，自問仲有好多事想做。咁講法，係咪覺得呢個諮委會浪費光陰呢？
卓妮