中環出更：兩愛孫未夠力拎金茶壺 黃家和先教沖咖啡
疫情漸趨緩和，市面活動恢復在即，但原定八月舉行嘅金茶王大賽，就未必能夠按往年嘅形式嚟舉行。香港咖啡紅茶協會主席黃家和指，活動籌備期間，遇上疫症環球肆虐，難以招攬各方高手同場比試。於是佢就打算變陣，改為食客前往參賽食肆品嘗奶茶，然後喺應用程式或大會網頁評分。換言之，消費者都有份做評判。
黃家和話目前要進行寫網頁嘅工作以實現呢個構思。雖然致力推廣港式奶茶，不過佢兩個分別七歲嘅孫女同五歲嘅孫仔，因未夠氣力拎起沉重嘅鋁合金茶壺，未具學習炮製港式奶茶嘅條件，不過要掌握沖咖啡嘅技巧，還是得心應手。
甄韋喬高叔平 疫下享天倫
黃家和指近日停課，孫女同孫仔經常到佢嘅辦公室，佢同兒子黃浩鈞就趁機傳授，調製香濃咖啡嘅方法。由於小朋友學習能力超強，沖咖啡不但似模似樣，仲會加上個人創意，譬如為一杯Cappuccino加添幾塊薄荷葉，不但加強視覺效果，連味道都有所提升。佢又指如果有年紀最細咖啡師呢項世界紀錄的話，佢嘅孫仔應該有機會問鼎。
願景基金會主席甄韋喬，疫情下亦享受天倫樂。日前佢就同媽媽，及長子偲瀚、媳婦思佩同埋孫女，四代同堂共遊南生圍。甄韋喬話因為疫情，孫女可以暫停學前教育，爺孫之間有更多相聚嘅機會。佢又話呢段時間難得得閒，可以同家人四處郊遊，發現香港其實係有好多風光優美嘅地方。除咗今次到南生圍試坐橫水渡，早前又同孫女漫步南丫島兼品嘗海鮮餐，開心到樂而忘返。
上海總會副理事長高叔平，就話佢兩個就讀國際學校嘅孫仔，雖然校方有提供網絡教學，不過整日宅在家的確悶透。所以佢有時都會同孫仔到海邊散步，除此之外又會同佢哋玩吓啤牌，刺激一下大家嘅腦筋。
卓妮