政情：趙麗娟減少應酬 疫境中活出健康
新冠病毒無疑係威脅人類健康，但有人亦因為疫情，其身體狀況反而得到好轉，究竟係邊個咁神奇呢？香港會計師公會前會長趙麗娟，就因疫情之下大家都減少社交應酬，令到佢過去患上嘅「三高」指數都回復正常，都可謂因禍得福喇。
食住家飯 三高指數回復正常
趙麗娟話自己因工作關係，經常出差應酬，加上平時出街食飯多數都係高油高鹽，結果就搞到健康亮起紅燈，成為高血壓、高膽固醇同高尿酸嘅「三高」一族。然而席捲全球嘅世紀疫情一到，令到好多社交活動、商業應酬都停晒，趙麗娟正因為咁，就多咗返屋企食住家飯嘅機會。
佢又話胞妹係家中大廚，因應佢患有三高嘅身體狀況，就特登揀啲低鹽油糖嘅餸菜嚟煮畀佢食，結果一個月多啲，佢嘅健康指標就全部回復正常喇。趙麗娟都話估唔到咁神奇，經過今次更深深體會到咩係「病從口入」添，佢仲提醒大家身體健康嘅關鍵，就係維持均衡飲食。