美國漫畫英雄不斷被拍成真人電影，當中嘅女超人更被大讚又索又打得。其實，喺日本寫真界亦有女超人睇得又好身手，甚至被喻為才色兼備，佢就係井桁弘惠喇。
日本寫真界好多女優都係身材豐滿而且生得細細粒，亦因為咁，一旦有身材高挑嘅女優出道，就會變得鶴立雞群，好似染谷有香、護亞沙奈、朝比奈彩等都身高逾一米七。提到朝比奈彩，佢最近成功進軍電視界且發展得相當順利，似乎唔會再繼續拍水着寫真，不過大家唔使失望，因為仲有井桁弘惠呢位新紮寫真超新星。
今年23歲嘅井桁弘惠，樣子清秀又帶點綺麗感覺，天生麗質令人印象深刻，只要望一眼就會記住佢個樣。除咗有絕色美顏，身材亦出眾，身高5呎7吋，高挑又纖巧，胸前卻擁有一對具斤両嘅美乳，加埋水蛇腰及長腿，曲線玲瓏浮凸，吸引觀眾嘅條件可以話應有盡有！
井桁弘惠喺2012年參加選美活動「Miss Teen Japan」，獲得「Samanth獎」之後就展開模特兒之路。不得不讚嘅係佢出道之後冇放棄學業，一直都半工半讀，兩邊兼顧直至喺早稻田大學畢業，之後仲考取好多專業資格，好似化妝品檢定、飲食顧問等證書，所以藝能界形容佢係才色兼備，真係冇誇張作大。
做咗幾年模特兒之後，弘惠就踏足影視界，當中最為人注目嘅演出就係特攝劇集《幪面超人ZERO-ONE》，佢唔似其他女演員咁做花瓶，而係飾演刃唯阿角色，成為《幪面超人》歷史上首位喺片集初期就出現嘅女幪面超人，前途無可限量。
井桁弘惠近期嘅工作主要介紹時裝以及演出《幪面超人ZERO-ONE》，所以喺社交網上發表嘅消息多數都係同呢兩方面有關，雖然性感照欠奉，但係想了解阿妹多啲一樣可以Click入去睇睇。
網址：https://twitter.com/hiroe_igeta23
年齡：23歲
身高：5呎7吋
三圍：33C-23-33
撰文：賢