政情：何啟明寸爆 黑暴叫人犯聚要找數
近日疫情稍為緩和，沉寂咗一排嘅反修例示威又再蠢蠢欲動，早前有人喺網絡陸續發起「和你唱」、「和你lunch」等活動，雖然獲得響應，但聲勢就不似預期。工聯會議員何啟明日前就喺網上串流平台拍片，寸爆有人「吹完雞之後就淆晒底」，又漠視「禁聚令」，同反問通訊群組管理員「叫完人出去唔使找數（定額罰款）啊」?
號召行動後「潛水」
何啟明認為響應網上號召之前，必須要明白後果。佢舉例指有六個人聯袂到某商場響應行動，結果就違反禁聚令唔可以超過四人聚集嘅限制，齊齊硬食二千元定額罰款告票。而網絡群組管理員就喺行動開始前一個鐘「潛水」。到底張告票要點樣處理？「幕後大台」唔願埋單，咁就梗係貴客自理喇！佢又批評有人出嚟「搞搞震」，有響應活動者更公然標榜「港獨」，咁嘅行為真係好過分囉。佢又不忘讚揚警察執法「做到嘢」，認為發告票可以警惕群眾唔好聚集，治安好啲之餘，亦令疫情傳染鏈斷裂，咁樣香港經濟先有得救。