政情：同姓三分親 岑智明受訪變認親
早前退休嘅天文台前台長岑智明，前晚喺社交平台同網友分享一篇文章，內容係佢早前接受一位雜誌作家訪問，兩人簡單傾談之後發現，因作家嘅媽媽同岑智明同姓，兩人繼而查閱《岑氏族譜》，發現大家竟然有親屬關係。
岑智明嘅祖籍係作家感到好奇嘅地方，又話因為佢媽媽同岑智明一樣都係姓岑，於是就諗到底兩人會唔會有關係呢，經了解後知道，岑智明同作家媽媽唔單止係順德人，更加係葛岸嘅同鄉，同屬一個祖輩。
與作家母親同宗
早有準備嘅岑智明於是喺背包拎咗本《岑氏族譜》出嚟，同作家喺密密麻麻嘅家庭族譜裏面，搵到大家所屬嘅位置，原來岑智明係作家嘅舅父輩親屬。呢次訪問對岑智明嚟講，都可以話係意想不到嘅驚喜！
岑智明又喺訪問裏面想當年，話自己晉升為天文台台長嘅時候，同時佢嘅媽媽就過咗身。至於點樣度過呢段艱難時期，岑智明話惟有透過不斷努力工作，諗少啲煩惱，會比較容易適應。