政情：議員鬧爆 抗疫自誇沉着應戰 陳肇始唔識「醜」字點寫

政府遲鈍 死不封關

陳肇始喺電台節目話，回顧本港抗疫一百日，對此覺得感恩，當政府第一日知道武漢有疫情之後，一直沉着應戰，其後推出唔同措施，包括關閉邊境、十四日強制檢疫及社交距離限制等，喺同事及義工等不同方面嘅共同努力下，行到依家都算「守得住」、「撐得過」。但佢強調目前外圍疫情因素仍然唔穩定，唔同地方仍有新型冠狀病毒個案爆發，港人要沉着應戰、唔可以鬆懈喎。

陳又話，好多市民同業界都期望放寬限制社交距離措施，形容放寬呢啲措施既係科學亦係藝術，要平衡感染風險，亦要讓市民同業界恢復生活。佢仲提及，政府打算想多兩步，包括作最壞打算，例如準備老人院舍爆發疫情，亦都會計劃未來，考慮現有隔離設施是否足夠，要唔要加強人手培訓對傳染病嘅認識等。目前亦搵緊更多地方應付爆發個案，短期內將有更多設施。又話即使疫情紓緩，都要做最壞打算，當局未來會繼續加強社區檢測及檢疫設施，及協助出院病人復康。

陳肇始講咁多嘢，議員郭家麒就批評佢完全係自吹自擂，諗番疫情爆發初期，政府甚至呼籲市民非必要時唔使佩戴口罩，並拒絕封關，要市民自己四出撲口罩等防疫不力嘅情景，至今仍歷歷在目，相對其他鄰近地區如澳門、台灣等地防疫反應迅速，港府只係等運到，郭仲話，好彩港人夠自律，才有依家嘅好成績，點知如今竟然話係政府功勞，鬧爆陳肇始簡直唔知個「醜」字點寫！

推出禁令 錯漏百出

其實諗番之前，外界成日猛烈批評政府防疫同抗疫嘅工作慢幾十拍，喺疫情最初，抗疫物品好似口罩等嚴重缺貨，市民就將矛頭指向陳肇始，鬧爆佢係「狗官」同「害人精」，防疫把關不力，之後又遲遲唔肯全面封關，被指有違專業，輕視疫情發展，直至推出社交戒嚴措施，又錯漏百出，被批評防疫措施做一半唔做一半，成效存疑等。喺咁嘅情況下，陳肇始仲自誇政府抗疫沉着應戰，真係笑大人個口。