中環出更：選民登記截止日 曾國衞巡視選舉處
昨日係新選民登記截止日，唔少人親身到位於九龍灣嘅選舉事務處辦事處遞交選民登記表格。新任政制及內地事務局局長曾國衞尋晚都去咗選舉事務處巡視，有區議員更把握機會向曾國衞反映有關選民登記嘅問題。
區議員趁機表達意見
西貢區議員黎煒棠（Ivan）話，尋晚佢帶咗過去幾日收集嘅選民登記表格到選舉事務處遞交，大約晚上七點半左右，當佢哋準備離開時，就巧遇曾國衞到場巡視。Ivan話，曾國衞當時在幾名選舉事務處職員陪同下進場，主要係想睇吓截止日選民嘅交表情況，而佢就上前向曾局長反映問題。
Ivan主要係反映選民登記電子化嘅問題，又關注到香港郵政因應疫情而隔日收信，好多市民都唔知道，若果喺尋日將選民登記表格放入郵箱，會否被接納，希望選舉事務處同香港郵政做好協調工作。面對咁多問題，曾國衞就表示會作檢視。
卓妮