中環出更：防疫大過天 梁福元：關公節一切從簡
香港雖號稱盛事之都，然而疫情導致好多民間節慶都變得黯然失色。繼長洲太平清醮要取消最受注目嘅幾項活動之外，十八鄉鄉事委員會前主席梁福元亦於日前透過社交媒體宣布，下個月喺元朗舉行嘅關公節，只會從簡進行。
梁福元指三年前首屆關公節於中環遮打公園圓滿舉行之後，高達十八公呎嘅關公像就移至大棠有機生態園內嘅關公文化廣場永久安放，往後嘅關公節亦喺該處舉辦。儘管第二及第三屆嘅關公節，設有盆菜宴招待長者，場面洋溢着熱鬧同歡樂氣氛，但今年礙於疫情，鑑於大眾嘅健康同安全為首要之務，是故第四屆關公節將一切從簡，期望大家理解及見諒。不過佢又實牙實齒咁話，下屆關公節嘅精彩活動必定再回來，到時將以全新面貌嘅關公文化廣場嚟招呼市民。
沈慧林膽博膽 參加鐘表展
香港鐘表業總會永遠名譽會董沈慧林就話，每年春季舉行嘅瑞士巴塞爾鐘錶展，係業界嘅頭號盛事，佢過去亦有到當地觀摩同參展。但自從展方同幾個國際大品牌割席，復又遇上世紀疫情，導致歐洲好多錶廠停工，今年巴塞爾鐘錶展嘅氣勢，可謂一落千丈。至於九月份嘅香港鐘表展，就係業界嘅另一盛事。雖然目前疫情趨向緩和，不過好多人都擔心情況會有反覆，而佢就膽博膽，一於抱住進取嘅態度去參展，以把握宣傳同銷售嘅機會。
除咗民間節慶同商業展覽，就連結婚擺酒呢種人生大事，都受到疫情影響。從事婚禮籌備嘅國際青商會基金（亞洲及太平洋區）委員譚麗時，就話唔少人因顧慮到疫情妨礙賓客出席，紛紛將舉行婚禮同酒席嘅日子一再延後。以致下半年嘅酒席場地相當緊張，亦有客人因心儀嘅酒店於今年可供宴席嘅日子所餘無幾，就連鬼節當日擺酒，亦要無奈接受。
卓妮