政情：競委會被指冇牙虎 胡紅玉臨別望增權
競爭事務委員會（競委會）主席胡紅玉（Anna）今日卸任，佢喺尋日最後一個工作日就為自己過去七年嘅主席生涯作總結，提到做呢份工作有滿足感同挑戰性，又感激政府喺過去幾年對競委會嘅支持。
之但係，Anna日前出席立法會會議時，透露競委會權力有限，無法迫使油公司交出燃油價格同折扣率等資料。面對競委會被市民形容為「冇牙老虎」，Anna就寄語政府應改善競爭法，並且賦予競委會更多權力咁話喎。
盼改善競爭法
做過唔少法定機構主席嘅Anna就話，其實一間機構係咪「冇牙老虎」，取決於佢有嘅權力同資源，同埋有冇努力爭取發展。佢尋日又進一步解釋，指競委會喺現行法例下進行市場調查時，並冇約束性權力逼商營機構交出資料，故希望當局參考其他司法管轄區嘅做法，賦予競委會更大權力。
Anna又希望政府未來改善競爭法，例如容許由個別受害人開展訴訟，以及引入集體訴訟機制。佢又認為，競爭法屬民事法，但喺法庭舉證時卻用刑事標準，認為政府將標準訂得太高。