中環出更：疫後最想去星洲 史立德食榴槤唔停得口
香港人工作壓力大、生活緊張，一有時間都鍾意出外旅行叉電放鬆吓，但係喺疫情影響下，好多國家都封城防止疫情擴散，就算依家有假期都冇得出去玩，只好乖乖地留喺香港。唔知喺解封之後，大家最想去邊度玩呢？
前幾日卓妮撞到香港中華廠商聯合會副會長史立德，佢話依家最想去就係新加坡，嗰邊環境舒服，平時一有時間都會去玩幾日，食嘢又啱食，尤其最鍾意就係食榴槤，同太太去到嗰邊食到停唔到口，又可以探吓朋友。不過，佢都話要睇吓嗰邊疫情係咪完全受控先夠膽去，而依家喺香港最大嘅娛樂就係喺屋企食飯同睇電影。
梁青華想去上海觀察同行
仁濟醫院董事局前主席王賢訊就話好多地方都想去，但礙於疫情都去唔到，如果解封後最想就坐高鐵去廣東省玩番幾日先，如果同小朋友去嘅話就會自駕遊，平時喺香港好多時都同老婆食飯睇戲，但依家惟有喺屋企乖乖地睇住電影先，周不時都問吓朋友有乜嘢好戲介紹，佢仲話支持香港政府實施禁令，始終都係為香港人好，相信疫情好快會過去。
解封之後想去邊？香港鐘表業總會顧問梁青華就最想去一轉上海，因為佢做鐘錶生意，香港經過社會運動同疫情之下步伐會慢咗，而上海喺鐘錶業呢方面比較出眾，可以了解零售及同行情況，上海菜啱自己口味，又多地方行，順道探吓老朋友，仲話依家周不時都睇吓相簿，回味吓啲開心時光，頂住癮先喎。
卓妮