政情：張竹君依然冇得抖 陳沛然斥分工有問題

黃加慶陳漢儀應代分擔

話說喺立法會衞生事務委員會尋日嘅會議上，陳沛然認為係分工有問題，先會令張竹君需要連續多個月喺記者會交代疫情，而冇得休息，佢又話若果衞生防護中心總監黃加慶同衞生署署長陳漢儀可以代替張竹君，喺記者會上交代疫情最新情況，張竹君就可以休息嘞！

三個人輪流開記者會，咁張竹君就算冇得放假，都可以抖吓氣吖，所以陳沛然就希望當局認真考慮佢提出嘅意見。不過，陳漢儀就話衞生署同衞生防護中心嘅同事好齊心，又話職員每日嘅工作都有分工，仲舉例話有職員需要負責疫情調查同港口衞生等工作，亦會調配中心以外嘅員工協助亞博檢疫嘅工作咁話。