政情：簡陳擷霞搞線上踩單車籌款
踏入四月，香港各大善團陸續進行董事局換屆，早前本來係博愛醫院舉行董事局就職典禮嘅大日子，但礙於疫情，惟有延期再辦。不過新任主席簡陳擷霞就依慣例於四月一日正式履新。
逆境百年一遇 靈活應變
回顧過去，簡太話佢嘅夫婿簡浩秋，廿多年前已擔任博愛醫院主席。不過邀請佢加入博愛醫院，就係另一位前主席張伍翠瑤。佢話舊年博愛醫院踏入一百周年，本來大家都予以厚望，然而曠日持久嘅社會運動，以及後來嘅疫情困擾，其挑戰之艱巨，係博愛醫院百年來僅見。而原定上個月舉行嘅單車籌款活動，雖則係每年一度嘅旗艦項目，但喺去年籌備期間，因此起彼落嘅街頭示威，令往時答應擔任義工嘅警察同懲教署人員都疲於奔命，難以騰出人手，加上場地申請又面對太多不明朗因素，無奈之下惟有將活動叫停。不過簡太認為逆境就更須講求靈活變通，因此博愛醫院打算舉行全港首個線上踩單車活動，既可藉此籌募善款，又可鼓勵大家勤做運動，可謂一舉兩得。簡太又話自己有幸成為第一○一屆董事會主席，相信會由佢開始，博愛醫院邁向另一個光輝百年。