中環出更：徐英偉櫈都未坐暖 議員促康文署重開場地
剛接任民政事務局局長嘅徐英偉，櫈都未坐暖，第一單要處理嘅事務可能係來自康體方面嘅問題。議員馬逢國尋日喺社交網站發文，指大量體育及康樂場所因防疫措施而關閉，為業界及市民帶來極大影響，要求政府盡快重開轄下場地。
馬逢國認為疫情於本地爆發，康文署轄下場地，包括公眾游泳池與運動場等康體設施全面關閉，屬防止疫情蔓延嘅必要措施。不過近日香港只有零星本地感染個案，康文署轄下場地係咪要繼續關閉，實在值得商榷。而本地康體教練及屬會，就希望康文署應考慮盡快局部重開轄下場地，至於具體執行方法，可倣效三月初局部重開嘅措施，限制使用及逗留人數，市民進場前須量體溫等。
指泳池相對安全
馬逢國又以內地游泳館為例，喺加強防疫措施下已紛紛重開。新加坡傳染病專家亦都認為去泳池游水係安全嘅；近日亦有本地游泳教練指出，游泳並非團體運動，絕少身體接觸，況且泳池水質含有氯、臭氧等幫助殺菌，是相對安全嘅運動，只要安排工作人員勤加消毒扶手等設施，以及限制更衣室等使用人數，重開公眾游泳池是切實可行的建議。雖然炎夏仲未到，但面對日益高漲嘅業界訴求，徐英偉睇嚟真要諗下辦法喇。
卓妮