中環出更：世紀疫症停工 余嫿重拾畫筆
藝術陶冶性情嘅作用，於今日抗疫嘅關鍵時刻，尤為重要。任職時裝設計師嘅傑出青年協會前主席余嫿，其工作就因疫情而陷於停頓。不知何日復工嘅心情的確令人焦慮，但幸好佢搵到一種抒發情緒嘅方法，就係執起畫筆繪畫水彩畫。
余嫿過往於體藝中學就讀，連續七年考得全級美術科嘅第一名，畫畫嘅功力梗係有番咁上下啦。不過後來考慮到謀生嘅問題，於是就投身設計工作以迎合商業社會，結果一轉眼廿年過去，直到世紀疫情先至令佢重拾畫筆。佢話會繼續自己嘅設計工作，亦希望日後可以為刊物畫插畫，以步向多元發展。余嫿今次繪畫嘅題材，除香港嘅地道食物之外，就係綻放嘅梅花。余嫿指梅花係武漢嘅市花，佢亦將以梅花為圖案嘅旗袍作品，參與杭州中國絲綢博物館於今年七月所舉行嘅主題展覽，以表達疫情盡快過去嘅祝願。
利慧玲：作品投射人嘅內心
本地藝術家利慧玲，就指一個人嘅繪畫作品，往往係其內心世界嘅投射。佢話見過有涉及家暴嘅小朋友，會以藥水膠布、血同刀為繪畫題材。而佢嘅學生，近日就喜歡以同學或上課情景為繪畫對象，反映小朋友都好記掛校園生活。講起返學，利慧玲話自己以前讀書成績欠佳，然而小學三年班嘗到繪畫比賽得獎嘅喜悅後，個人自信倍增，因此佢相信繪畫係有療愈效果。
除咗繪畫，攝影同音樂都係一門藝術。熱愛攝影嘅香港中華廠商聯合會前會長李秀恒，今年旅遊攝影嘅計劃雖因疫情而擱置，不過佢話會利用呢段時間，用圖像軟件處理自己嘅攝影作品。鑑於今年係貝多芬誕生二百五十周年，佢不但會鑽研貝多芬嘅經典樂章，亦會將攝影作品同音樂融合，咁就可以一次過滿足視覺同聽覺嘅享受啦！
卓妮