政情：公民講場：扣分制未能阻嚇 公屋依舊亂拋垃圾

政府宣傳叫市民唔好亂拋垃圾，要保持公眾衞生，但成效點呢？運輸及房屋局公布嘅數字顯示，有關公共屋邨扣分制下亂拋垃圾嘅個案，一九年較一八年增加，而發出嘅定額罰款通知書都大幅增加。點解有扣分制，但亂拋垃圾嘅個案不減反增，反映運房局局長陳帆喺檢控方面做咗嘢，但冇阻嚇作用，陳帆唔可以齋睇檢控數字高就有成效，要諗吓有乜實際方法阻止呢啲問題先得，否則扣分制只會變成冇牙老虎。