政情：教大校董會主席 馬時亨續任至年底
香港教育大學校董會主席馬時亨任期屆滿，政府尋日再度委任佢擔任主席，但佢話因個人原因未能接受續任三年至二○二三年，只會做到十二月三十一日。點解呢？事關佢話將會出任由佢大女馬露明創立嘅「品格教育協會」主席，希望年底前當局物色到教大校董會主席嘅繼任人選。
將加入大女所創「品格教育協會」
馬時亨喺一七年四月起擔任該校校董會主席，佢喺致師生嘅信件中解釋，曾考慮身兼「品格教育協會」同教大校董會主席兩職，但考慮到兩者工作或有模糊界線等問題，更加唔希望外界對校董會日後嘅審議及決策過程，有利益衝突或角色混淆嘅疑慮。為持守大學管治嘅最高標準，佢惟有婉拒教大校董會主席呢個重任。
教大校長張仁良對馬時亨嘅決定感到惋惜，感謝佢過去三年嘅貢獻，帶領教大喺各方面取得長足嘅發展。教育局局長楊潤雄感謝馬時亨再度接受委任至年底，又感謝佢過去對教大作出貢獻，又話政府會物色適合的人選擔任教大校董會主席。