政情：退休再就業 蕭如彬任物監局CEO
再有退休高官再就業。律政司前政務專員蕭如彬喺上年四月退休離任，相隔咗一年後，由今年四月二十日起擔任物業管理業物監局行政總裁，但離職公務員就業申請諮詢委員會（諮詢委員會）就對佢擔任新職列咗幾項限制㗎。
諮詢委員會列出嘅規限，包括申請人必須離職前休假終止後先可以做，而受僱喺準僱主期間，申請人亦不得使用或披露係政府任職期間所取得嘅任何機密或敏感資料。
曾當8年律政司政務專員
其實物監局日前宣布，經過進行公開招聘程序，聘請蕭如彬做物監局嘅行政總裁，任期由四月二十日起生效。物監局主席謝偉銓就話蕭如彬嘅政府行政經驗豐富，又熟法律嘢，加上佢話面試都唔容易㗎，面試者仲要提交一份計劃書添，所以佢都覺得蕭好有心想加入物監局㗎！
蕭如彬由一九八六年七月起開始加入政府政務主任，做過多個政府決策局同部門，例如商務及經濟發展局副秘書長（通訊及科技），同埋政府產業署署長，不過最令人留意嘅都喺佢係退休前擔任律政司政務專員八年喇。