政情：禁聚令一延再延 梁栢賢盼快啲「復活」
雖然近日本港疫情係有所紓緩，不過政府將禁聚令嘅實施日子一再延長，就似乎好多人都有微言。醫管局前行政總裁梁栢賢，尋日就喺社交網站發出貼文，話專家只懂禁、唔識放，有違市民期望！明顯係對於擾亂日常生活嘅禁令，唔多滿意咁話。
斥施政習慣慢半拍
梁栢賢其實係先後兩度發文，首先係指疫情未來數月定有反覆，要有長跑準備，要快緩有序，能收能放，希望專家盡快提出「復活」恢復日常生活嘅適時建議，以解民困。後來又話政府整體控疫工作，相信大部分市民都滿意，但如果要等民意先會計劃放寬禁令，呢一種慢半拍嘅施政習慣似乎還有很大嘅改善空間。
梁栢賢嘅貼文一出，惹來唔少網友附和，有人話今次疫情需要長期對抗，無可能幾個月都禁止工作及生活；又有人以手術成功、病人死亡來比喻延長禁聚令，最後大家唔係病死而係餓死！亦有人認為政府決定延長禁令之時，要參考經濟同心理學家嘅意見。網友嘅留言，睇怕政府唔可以視若無睹喇。