政情：國際油價跌破蛋 香港油價拒大減 議員怒捉黃錦星算帳

多名議員關注國際油價跌至歷史低位，但本港零售燃油價格仍然高企，認為非常唔合理，促請政府唔好再以尊重自由經濟為由迴避問題。議員陳凱欣話受疫情影響，國際原油供應過剩，油價由年初暴跌八成，但本港油價下調唔夠一成，油價係運輸業界其中一個好大嘅開支，認為依家有好大減價空間，環境局局長唔能夠迴避。

另一名議員容海恩亦希望政府解釋，喺監察油價及與油公司討論上係咪遇到問題，議員周浩鼎就話黃錦星已答應出席委員會會議嘞！

質疑合謀定價 促競委會調查

唔單止議員關注，工聯會尋日亦到競爭事務委員會辦事處請願，指現時本港車用燃油價格嘅走勢，同國際油價嘅跌勢相反，令到運輸業界要繼續「捱貴油」，因此質疑本港油公司可能涉及合謀定價，要求競委會就此盡快展開調查。

工聯會又指競委會喺展開執法調查前嘅研究階段，無權要求涉事嘅人同企業提交資料或證據，猶如「冇牙老虎」，因此要求政府增加競委會法定權力，令競委會喺研究階段就有權向被研究對象索取資料，並就拒絕交出資料制訂罰則。工聯會又促請政府開放燃油市場，為本港引入除新加坡以外嘅燃油產品。

消委會勸喻油商守 社會責任

對於被要求調查油公司有冇合謀定價，競委會回覆話察悉公眾對本地車用燃油價格嘅關注，正密切留意有關情況，但唔評論會唔會展開調查。亦對近日油價急跌，但本港零售油價仍然高企深表關注，已就過去一段時間油公司嘅價格同各項經濟因素作深入分析。消委會強調本港車用燃油涉及廣大市民利益同福祉，油公司應本着企業社會責任，提供更多資料，以便社會監察。

各界早就鬧爆油價「加快減慢」，但政府一直都只係意見接受，態度依舊，市民就繼續「捱貴油」，真係嬲到爆炸，黃錦星要快啲諗方法減油價，冇得再側側膊。