中環出更：廖振新「搞笑篤Mon」 開電腦搞半粒鐘
電子科技日新月異，唔係人人都跟得上。好似發展局副局長廖振新尋日出席立法會會議時，用咗成半個鐘先開到枱頭部電腦，更加篤咗一個根本唔係輕觸嘅電腦屏幕（Mon）足足一分鐘添！
廖振新尋日朝早大約九點去立法會聽會，一坐低就打算打開枱頭部電腦，但睇嚟佢唔太成功喇。記者發現佢用咗差唔多成二十五分鐘都開唔到機，唔知係太早未瞓醒定平時少去立法會唔熟啲裝置。
連開關掣都搵唔到
佢仲一度熄咗個電腦，不過佢好似連個電腦開關都搵唔到，係咁篤個根本唔係輕觸嘅Mon，去到九點四十五分先開到機。由立法會九點開會，去到九點四十五分，差唔多成粒鐘喇，佢先睇到立法會嘅直播。睇嚟佢要嚟多幾次立法會，好好學吓點用電腦喇！
卓妮