中環出更：孫大為引入微奢國潮錶 轉攻本地市場
經過舊年嘅社會運動同接踵而至嘅疫情，過去依賴遊客消費而發大財嘅生意，受創甚深。香港鐘表業總會顧問孫大為，就認為係時候將目光重投於本地消費者。而佢就無懼疫情，喺今個月初開設以售賣國產錶為主嘅實體店。佢話國產錶不但性價比高，兼且喺「微奢」同「國潮」嘅概念下，應該有唔少本地消費者受落。
到底乜嘢係「微奢」呢？孫大為話其實係內地人對Affordable Luxury嘅中譯，即係指質素與品味都同外國奢侈品相近，然而售價就親民得多嘅國貨。至於「國潮」，就係融會中國文化特色嘅潮流商品。因好多港人於成長期間，都有使用內地生產嘅商品，以致今日都能夠持正面態度去評價國產錶。佢話由舊年六月開始，入境遊客雖然大減，但國產錶嘅銷量依然保持平穩，可見國產錶係有其競爭力之餘，亦反映本地巿場相當重要。
李豐年：烘焙食材銷量反升
經營糧油食品生意嘅九龍總商會副理事長李豐年，就話港人居家避疫，酒樓食肆向佢購買食材嘅數量難免有所縮減，不過由於好多人宅在家享受下廚樂，同烘焙有關嘅食材如麵粉同發粉，銷量就反而多咗。鑑於居家煮食通常會觸及豬、牛、禽肉同海產等食材，所以佢會考慮開展急凍食品業務，無論禁聚令有冇延長，呢門生意都應該有得做。
疫情引致百業蕭條，升斗巿民所面對嘅壓力難免大增。摺鋁藝術家李浩迅最近就同心理學家合作，製作七套「一分鐘鬆一鬆」嘅動畫短片，以趣味形式同大家講解一下，如何認識同處理日常生活所遇到嘅壓力。而故事內容，就圍繞上有高堂下有子女嘅年輕家庭，塑造角色方面就係將汽水罐擬人化。佢話無論大人抑或小朋友，都有好多有待滿足嘅欲求，就好似一個空嘅汽水罐，但其實心靈上嘅知足，先至係快樂嘅泉源。
卓妮