政情：八網難逃：領巾蒙面踩單車 梁敬國：焗兼易走位
鍾意游水同踩單車嘅商務及經濟發展局前副局長梁敬國(Godfrey)，上次就三缺一，即係三個人一齊去踩單車，前幾日三缺二，得番佢一支公輕裝上路喎。
一個人有一個人嘅樂趣嘅，唔知係咪上次首次戴口罩踩單車，覺得太怪雞，所以佢今次就轉咗用領巾蒙面，以為咁樣對踩單車好啲，點知經過呢次實戰後，佢發覺都係比較焗同容易走位。嘩！要一邊踩，一邊要調校條領巾嘅話，都幾麻煩喎。
帶搓手液口罩成常態
佢話依家要喺疫症中保持身心健康，離唔開運動，而帶備搓手液、口罩亦已成新常態，仲話全球政府應該思考點樣喺呢個新常態下，令社區同經濟逐漸重回正軌，直至疫苗同治療藥物成功面世。雖然離開官場，但佢依然好關注社會嘅動態，佢仲話派錢同挽救中小企係當務之急呀！