政情：反對派拉布阻批救命錢 陳健波斥攬炒心態可怕

繼續落去必拖垮香港

波哥喺社交平台上載咗一段短片，提及朱凱廸當日提出中止待續議案仍然好氣憤。佢話議員要政府加番議員嘅意見，先再拎上嚟審議，表面睇嚟好似好合理，但係各行各業都喺水深火熱之中，市民好需要呢筆「救命錢」，正所謂救人如救火，唔可以再拖。佢指政府亦話依家唔通過嘅話，日後未必可以再拎上嚟，換言之，遲啲有錢都未必救到。佢又話反對派對政府有乜唔滿意就攬炒，亦唔知等到幾時反對派先會收貨？

當日反對派對撥款申請投咗反對票同兩票棄權票，波哥直指完全反映反對派攬炒。佢又舉例，話好似有一個患咗重病嘅人，但有個方案可以七成醫好佢，但係有人話要接近完美嘅方案先可以醫，之後先再醫喇！如果嗰個病人出到聲嘅話，必定鬧「我就嚟死喇，仲唔快啲醫我？」

佢話反對派攬炒嘅心態只會繼續落去，而且愈嚟愈得人驚，若果日後反對派有話事權嘅話，必定拖垮香港。