中環出更：屈喺屋易摩擦 陳振彬籲多包容家人
新冠肺炎疫情持續，好多市民都多咗留喺屋企，一家人見面多咗，有時更易起衝突。全港社區抗疫連線總召集人陳振彬話，組織設有電話輔導熱線，最近收到好多人訴苦同埋屋企人多咗爭執。
陳振彬話經歷過上年嘅反修例示威，好多家庭都出現裂痕，仔女好容易因父母講咗句唔啱聽嘅說話就駁嘴。就連夫妻之間都多咗摩擦，佢話兩公婆平時都要返工，頂多咪收工後一齊食餐飯，無咁易睇到對方缺點，但大家屈喺屋企心情差，少少事都好易「爆炸」。佢舉例，先生可能平時都唔幫手洗碗，太太過去都可能會忍，但依家見多咗，就好易睇唔順眼。佢話中國人最叻就係中庸之道，既然係一家人，咪互諒互讓吓啦！
蔡德昇全家困英個半月
唔講唔知，原來公民教育委員會委員蔡德昇早前一家五口困喺英國有個半月咁耐。佢話喺農曆新年一家去咗英國探仔，順便喺嗰邊過年，眼見香港疫情愈嚟愈嚴重，於是佢哋決定喺英國留耐啲，同時安排細仔同囡囡喺當地讀一啲課程。點知等吓等吓，發現英國嘅疫情都好嚴重，於是就撲機票返港，返到嚟雖然要隔離十四日，但總算鬆一口氣。佢話呢次英國之行多咗好多時間同家人相處，都係一個好大嘅得着。
家庭與學校合作事宜委員會主席湯修齊配合防疫措施，大多留喺屋企，多咗同仔女相處嘅時間，早前佢就同囝囝Harris到尖沙咀海旁抖下氣，Harris有六呎五吋高o架，而Harris八月會去美國升讀大學，佢好希望全球疫情快過去，否則到時可能仍要留喺香港家中喺網上修讀大學課程。湯修齊仲話囡囡Athena最喜歡畫畫同砌積木模型，喺假期中就同Athena一齊完成咗十幾套模型添！
卓妮