政情：郭炳江父子 疫境齊送暖
即使瘟疫無情，都無阻人間有愛。話說新鴻基地產資深董事郭炳江同佢阿仔郭基煇有見疫情來勢洶洶，令好多基層都頓感徬徨無助，所以每個月都捐出一萬個「抗疫福袋」及一萬五千個飯盒畀基層市民，希望可以為佢哋喺「疫」境中增添溫暖。
每月贈福袋飯盒予基層
原來郭氏父子由今年二月開始，陸續透過多間非牟利機構向基層市民捐贈抗疫物資，並向佢哋送出由集團旗下某間酒店員工所炮製嘅飯盒。
郭炳江表示，疫情令人心煩不安，而最好嘅良藥就係助人自助，人與人之間嘅愛令佢哋堅持同心同行。雖然近排有「禁聚令」，令社交要保持距離，佢建議大家可以多啲主動打電話關心家人同朋友，一齊發揮互助精神，同心抗疫，度過艱難時刻。佢又話目前酒店生意雖受疫情影響，仍鼓勵酒店員工參與今次捐贈行動，從而幫助有需要嘅人士，體現生命嘅意義咁話。
對於郭氏父子嘅善意捐獻，其中一間受惠機構尋日就喺其Facebook專頁出貼感謝，仲話有位單親媽媽面臨失業，佢唔單止要照顧年紀仲細嘅仔女，又要顧及口罩同其他生活必需品嘅存量，今次獲贈「抗疫福袋」嘅佢就好比得到及時雨，一解燃眉之急。