中環出更：政府向區會開刀 18區撥款削2.6%

阿Roy話早幾日收到當區區議會秘書處通知，要求區議員同意撥款分配建議，而荃灣區議會同各委員會嘅撥款額較上年度減少約百分之二點六，涉及大約五十七萬港元。阿Roy大鬧「政府明顯要同區議會開戰啦」，又呻話政府事前根本就冇諮詢區議員嘅意見，唔知係咪用「抗疫」為理由，實質向區議會施壓。

民署稱應急計劃佔用款項

荃灣區議會民主派嘅區議員尋晚已發聯署聲明，抗議政府嘅做法，要求民政署解釋削減撥款嘅原因，同埋發出更新撥款建議。

而葵青區議會主席單仲偕亦證實早前收到秘書處嘅通知，話葵青區都要減涉及一百五十萬港元嘅撥款，而民政事務總署嘅理由係因為應急計劃要增加撥款，所以各區議會都需要減少撥款，但佢相信各區減撥款嘅比例係一樣嘅。

至於減少撥款係唔係政府嘅打壓手段？佢話之前要成立各委員會，民政署已用各種手段阻止啦，今次從資源方面着手，覺得係財政打壓囉，但佢就認為冇得反對喇，因為驚政府全部撥款都唔畀呀！

卓妮