中環出更：居家避疫胡炎松教後輩品茶禮儀
停課期間年輕人要保持學習，除咗透過上網，就算係飲茶都可以學到嘢（口架）。香港潮屬社團總會常務會董胡炎松因為疫情，終於有時間為論文集搵吓資料，同多咗歎茶嘅閒暇。佢話飲茶不但清熱寧神，更會涉及相關嘅人情世故同禮儀，好值得向下一代推介咁話。
胡炎松目前家住新界，因為鍾意夠清靜，閒時會坐喺花園冲茶飲，一有機會佢就會同後輩講下飲茶嘅禮儀。例如規矩係唔容許將飲剩嘅茶留喺杯入面，而要倒落茶池，同埋飲茶都好講究論資排輩，一定要等長輩拎茶先。胡仲話，如果有重要嘅客人到訪，屋主可能會更換茶葉以示尊敬，但如果屋主一直唔換茶葉，時間一長啲茶自然愈飲愈淡，就暗示你係時候要走喇。
紓壓提神 楊育城楊偉誠都愛飲
潮州人鍾意飲茶，九龍東潮人聯會會長楊育城對飲茶亦有一番心得。最近因居家避疫，楊都多咗時間冲下功夫茶，每日嘅中午同夜晚都會飲。楊話潮州人同三五知己一聚頭就會一齊飲茶，飲開茶之後如果唔飲就會囉囉攣。佢習慣飲單叢，可以消滯。疫情令大家精神緊張，楊話飲咗茶成個人都開心啲，可以清熱解毒，回甘提神，依家就算出街食飯都唔會飲其他嘢淨係飲茶。
西九戲曲中心顧問小組主席楊偉誠都好鍾意飲茶，佢日前喺社交平台發文，話自己做咗成日文件同教材準備工作，有啲倦意，而佢覺得最好嘅提神方法就係安坐於心愛嘅茶壇，泡一泡珍藏咗十五年嘅重火烘焙鐵觀音，仲即刻投入咗品茶嘅意境，就好似置身喺草木之間咁，非常放鬆。喺佢上載嘅相片入面見到十幾二十個大大小小嘅茶壺，睇嚟佢對冲茶好講究啊！
卓妮