政情：八網難逃：陳岳鵬用視像與友隔空對酒

新冠肺炎疫情持續，為咗減低傳染風險，好多市民都選擇留喺屋企抗疫。網上程式Zoom愈嚟愈流行，唔單止用Zoom嚟上堂、開會同工作，市民都會用Zoom同親朋好友傾吓偈。政制及內地事務局前副局長、馬會行政經理陳岳鵬（Ronald）都唔例外，但佢就搞搞新意思，同朋友一齊隔空暢飲。

Ronald日前畀朋友標註喺社交平台，原來佢同另外兩個朋友一齊玩Zoom見面，特別嘅係佢哋用Zoom一齊飲酒，每人都各自揸住支酒隔空合照，標註佢嘅朋友仲話好鍾意同兩位舊朋友一齊網上飲酒添！唔少網友留言，話好想加入，叫佢哋如果下次再飲，要叫埋網友呀！