政情:梁美芬向專家取經 拍片教整草本飲品

新冠肺炎疫情下人心惶惶,除咗戴口罩同勤洗手之外,到底仲有咩方法可以預防染疫呢?經民聯議員梁美芬前晚喺社交平台上載短片,特意向自然療法學醫學專家賴冬妮(Dr.Lily)取經,趁機學整增強免疫力,而且又平又正嘅草本飲品,話要同大家留喺屋企「防炎抗疫」喎。

有助提高免疫力

梁美芬問點解春天特別多病菌?Dr.Lily解釋,因為春天嘅濕度比較高,(人體)適應相對變差,面對潮濕嘅環境就唔係太好,令出汗嘅情況少咗,所以今次整呢隻飲品用天然草本有助提高免疫力。

Dr.Lily介紹材料,包括百里香、香茅、檸檬同薄荷葉,佢叫大家先將香茅剪碎,然後放入煲煮,佢話香茅本身有驅蚊作用,食用後可利尿去水腫,從而增加紅血球嘅氧氣含氧量。

煲煮香茅五分鐘之後又點做呢?就係落切咗件嘅檸檬喇!梁美芬話好鍾意聞檸檬陣味,Dr.Lily就話好多人唔知檸檬皮上面有檸檬香薰油,有種叫做檸檬稀酸嘅物質,飲檸檬水係有好處。

最後落埋百里香同薄荷葉,閂埋蓋焗五分鐘就搞掂!佢哋仲齊齊試飲成果,梁美芬大讚真係好好味,仲寫埋食譜畀大家喺屋企整添!

第一手消息請下載on.cc東網iPhone/iPad/Android/Windows Phone Apps