政情：激辯港人身在福中不知福 林琳黃之鋒嗌到疊聲

兩人都異口同聲話港人唔幸福，黃之鋒認為幸福係建基於民主、自由、人權同法治上嘅保障，但認為現時港人被打壓，而政權喺政治環境中完全冇受權力制衡，形容港人係「不在福中更知福」，相信自己有權去決定幸福。

林琳：攬炒有幸福可笑

林琳就話近月有人因意見不合，就喺街上打人、甚至放火燒人，仲比喻話屋企有人長期對自己惡言相向，反問「咁樣幸福咩？」佢仲直斥政府真係做得好差，但認為隨時可以換，質疑係咪要去到咁盡。佢仲話有人推動犯法，指「攬炒可以有幸福」同「坐監可以令人生更精彩」一樣咁可笑，反問香港點解會淪落到咁嘅地步。

之後喺兩人互相質詢嘅環節時，林琳就喺黃之鋒發言時開始疊聲，先反問「你覺得香港政府冇權力制衡你，就可以隨時燒人、隨時可以打人？」仲質疑黃係咪覺得政府做得唔好就可以燒人。黃最初都有讓畀林發言，但後來你一言我一語咁各自表述，黃就忍唔住同林講，話論壇唔係個人表演，係要有觀點交流，唔應該疊聲。以為林會即刻收聲，點知即刻被林反駁話呢度唔係普通選舉論壇，可以講任何嘢。最後主持都忍唔住，要求兩人唔好再疊聲同埋盡量互相交流，但林一於少理，繼續自己有自己講。

其後兩人又再嚴重疊聲，林琳批評港人唔理法治，令自由、民主、法治等喺過去九個月受嚴重威脅，包括住址曝光、有人揚言要私了佢、喺餐廳食飯都唔敢亂講嘢，驚畀人放上網然後會被打。而黃之鋒就不停解釋，話因為香港人知自己唔幸福，所以先要推倒體制。

評判質疑辯論無意義

台下有評判就批評疊聲好麻煩，形容聽得好辛苦，仲質疑辯論「毫無意義」。有評判更指黃之鋒「扮咩斯文」，認為對方已用潑婦罵街式，就應要同對方鬥大聲。其中一個評判、議員謝偉俊（Paul）就話，世界上有唔少地方都有民主、自由，但命仔都保唔住，反問邊度仲有幸福？而唔少年輕人喺疫情時都選擇返嚟香港，質疑係咪政治制度代表晒所有福氣製造者。其後阿Paul就被另一名評判批評係「理論魔術」、「妖言惑眾」，認為命仔都冇係因為政府問題。