中環出更：運動場閂晒黃梓謙摸黑去跑步
疫情未過，政府實施「禁聚令」，市民大多選擇留喺屋企，但冇得出街屈喺屋企好悶o架！凝動香港體育基金創辦人黃梓謙（Gary）就keep住跑步，仲話希望社會領袖提醒市民要鍛煉強勁嘅體魄去抵抗疫情喎。
Gary話政府轄下好多運動設施都停用，但運動場嘅跑步徑都有開嘅，所以佢會去跑步，但就唔會留太耐啦。佢話以前覺得隨時都可以跑步，所以唔識珍惜，依家喺疫情期間要夜晚「偷雞」，搵少人嘅時間去跑，反而學識咗珍惜。佢仲話基金之前都拍咗好多「停課不停運動」嘅短片，希望藉此提醒市民，就算唔可以出街做運動，喺屋企都要做，而唔好淨係玩手機、發呆，因為唔運動身體都會變差o架！
黃業光揸跑車變咗玩單車
運動場閂晒，搞到香港鐘表業總會前主席黃業光（John）嘅太太（Grace）冇得打羽毛球，淨係可以落街急步走。阿John本身打算出國揸跑車，面對疫情亦被迫取消行程，但佢就開始玩啲「兩個轆」嘅車，就係單車啦！佢話呢排同朋友踩單車嘅次數多咗，但都會注意唔超過四個人，有時仲會喺東涌搵山路踩去大嶼山添！面對疫情，佢話雖然唔少後生仔康復得好快，但都要多運動增加自身抵抗力先重要。
熱愛游泳同踩單車嘅商務及經濟發展局前副局長梁敬國（Godfrey）就喺Facebook上載同朋友去踩單車嘅相，話「困於室內已久，行山人潮如水，區間踏車較佳。」身為前高官嘅Godfrey去踩單車時都嚴格遵守「禁聚令」喎。計埋佢自己，一行三個人去踩單車，途中戴埋口罩添！佢話雖然麻煩又怪雞，但都係「一時風情，歷史當記下此刻」咁話喎。
卓妮