本港嘅投票同點票程序一直遭人詬病，人手點票被轟猶如「石器時代」，政府近年就話搞電子點票，點知最近又話未能趕及今年九月試行，但根據最新民意調查結果顯示，有近六成受訪者贊成推行電子點票，試問政府點追落後呀！
喺舊年十一月嘅區議會選舉，多區票站出現長長人龍，點票又費時，正當期待政府稍後會利用電子點票之際，政府早前透露，因舊年中爆發社會運動同今年初開始嘅疫情，電子點票嘅相關工作進度大幅延遲，因此未能趕及喺九月試行。
然而香港研究協會喺三月二十七至四月三日成功電話訪問咗逾千名市民，尋日公布嘅調查結果顯示，有近六成受訪者贊成喺未來推行電子點票，而贊成應利用身份證嘅指紋識別技術核實選民身份亦近八成。
呢個調查結果反映市民都想減少因人手點票造成嘅失誤，之但係，政府到依家仲未提出推行電子點票嘅時間表，難怪會有人質疑政府未有善用科技。研究機構又指有一半受訪者認為舊年嘅區議會選舉有出現選舉不公或舞弊情況，形容情況值得關注，呼籲當局要認真檢討過去選舉嘅安排咁話喎！