中環出更：在家細藝多 葉鍾佩雲自學染髮
疫情之下雖然好多人都「宅在家」，社交接觸大減，但女士嘅儀容仍不可草率。善德基金會永遠名譽會長葉鍾佩雲（Catherine）近日就因居家避疫，善用閒暇自學染髮技巧，將一頭青絲處理得色彩絢麗，效果直逼專業水準咁話。
Catherine早前喺社交網站上載咗幾張相，仲貼文話疫情下，居然成功喺屋企染髮、幫頭髮焗油、按摩美容，仲話等各種技能掌握得熟練嘅時候，日後可能有好出路添！其實佢都唔使等日後，事關佢個Post一出街，好多網友都大讚佢手勢好，染得好靚、好均勻，又亮澤，直情開口叫佢幫手染髮，仲話願意排隊去做佢嘅客人添！不過亦有網友質疑，留言問佢係咪老公幫手染o架？佢斬釘截鐵咁話「當然唔係啦！俗語有云 ：求人不如求己。」
楊靜自己種豆芽 老公有口福
香港中華出入口商會副秘書長楊靜（Sally）自從進身主婦廚神之後，對食材嘅質素特別重視之餘，又嘗試親手種植。繼上次佢喺屋企自製水餃皮包餃子，最近就喺屋企成功培植有機豆芽，開心到不得了，仲即刻煮嚟食添！Sally仲話豆芽無添加，係健康美食。有呢個朱師奶廚房，佢老公朱容基有口福嘞！
至於香港工業總會副主席陳嘉賢（Karen）就話「宅在家」嘅最佳消遣，當然係同囝囝享受下廚樂啦。坦言自己廚藝唔算高明嘅Karen話，好彩超市有售「預拌粉」呢種食材，同囝囝製作糕餅就簡單好多喇。儘管按包裝上指示嘅做法就可順利完成，不過Karen話會藉製作量增加或減半，乘機考下囝囝嘅四則運算，又會嘗試塑造糕餅造型，譬如整下薑餅人或兔仔之類。佢話睇住兩母子嘅心血喺透明嘅光波爐裏面烤焗成形，主宰一切嘅感覺油然而生，難怪下廚樂呢種細藝，佢同囝囝玩極都唔厭。
卓妮