政情：公務員延遲退休 警務處逾四千人最多
政府早前推出延遲公務員退休方案，但唔知有幾多合資格公務員會選擇延遲退休呢？有議員就此向公務員事務局提出質詢。當局表示，去到今年二月中，喺大約五萬六千個合資格嘅公務員入面，約有二萬七千四百人選擇延遲退休，佔當中接近一半嘅人數。而人數最多嘅係警務處，有成四千三百零一人，其次係食物及環境衞生署，有二千八百八十一人，同埋消防處，共有二千三百二十人。
港府新年度增六千職位
雖然有好多公務員選擇延遲退休，但政府喺啱啱嘅財政預算案就提到，會喺二○二○至二一年度公務員編制增加職位。公務員事務局話，政府將於新年度增加大約六千個職位，增加最多職位嘅部門都係警務處，增加約二千五百個職位，其次係康樂及文化事務署，增加近三百個職位。海關就排行第三，共增加二百九十三個職位。
不過，都有啲政府部門冇增加人手，包括行政長官辦公室、環境局、郵政署、醫療輔助隊、財經事務及庫務局（財經事務科）等，而香港金融管理局就扣減咗三個人手添。