政情：驚現病徵家居隔離 任嘉兒拍片教做測試
唔少區議員喺疫情期間都繼續落區，中西區區議員任嘉兒（Camille）都唔例外，去唔同大廈派搓手液同防疫單張，但Camille早幾日覺得唔舒服，出現腹瀉、咳、喉嚨痛嘅病徵，於是去求醫，依家已經做咗新冠肺炎病毒測試，雖則未有結果，但已自我家居隔離。
話說Camille尋日喺Facebook（Fb）發貼，話大學區已有八人確診新冠肺炎，又話自己之前去過確診疫廈派防疫用品，仲提大家「病就記得睇醫生」。佢亦順手轉發星期一拍嘅短片，教大家做深喉唾液樣本測試。
深喉唾液樣本 應瞓醒抽取
點做測試呢？Camille話最好朝早起身首先就攞咗個深喉唾液樣本先，另外千祈唔好掂到樽仔入面，以免影響測試結果。
為慎重起見，依家佢要乖乖哋家居隔離十四日，確定冇發病，先可以再外出做服務嘞！