二○一六年嘅立法會選舉喺投票同點票方面都遭到詬病指流程太慢，事後唔少人提出要將選舉投票同點票過程電子化。
就此有議員喺特別財會提出書面問題，跟進本港依家研究喺各級選舉試行電子點票嘅進度，政制及內地事務局尋日就以書面回覆提問，指因為反修例示威同新冠肺炎疫情拖慢電子點票嘅研究進度，所以嚟緊嘅選舉就用唔到喇。其實點解電子點票研究咗三年幾都未搞掂，唔通個點票機勁到識飛？
議員張國鈞早前喺特別財會提交書面問題，希望了解依家本港各級選舉試行電子點票嘅研究進度，同埋會唔會喺下屆選舉試用。政制局就話，佢哋一直有積極研究喺選舉推行電子點票嘅可行性，但就話市面上暫時未有點票機處理到依家選舉用嘅選票尺寸，又指喺現行嘅選舉引入電子點票有實際困難。
其實早喺二○一七年政制局已經講過話要將選舉電子化，而舊年一月亦有消息話嚟緊嘅選舉可能加入電子點票，但依家個回覆講到戴晒頭盔咁，即係搞唔掂啦。
政制局話佢哋原本打算喺區議會（第二）功能界別試行電子點票，同埋舊年都公開招標咗o架喇，不過最衰都係反修例示威同新冠肺炎疫情拖累啦，搞到研究進度慢晒，趕唔切喺嚟緊嘅選舉推出喎。不過都係嗰句，搞咗三年幾都係得個吉，咪賴啦。