中環出更：小廚神街市買餸 陳志豪囝囝變師奶殺手
唔好以為小朋友乳臭未乾，就必定係少不更事，其實只要加以栽培，懂得發揮其小宇宙的話，其表現往往可以令人刮目相看。香港廣西社團總會副會長陳志豪（Victor），佢嘅囝囝雖然小小年紀，然而廚藝了得，街坊仲視佢為「師奶殺手」添。
Victor話囝囝之所以有呢個綽號，皆因疫情之下好多活動都告吹，為善用空閒時間，於是就同囝囝去買餸，發覺喺街市同囝囝打招呼嘅人仲多過自己，可見小朋友嘅魅力真係沒法擋，搞到Victor自己都有些少呷醋咁話。而去得街市買餸，就梗係打算玩煮飯仔啦。Victor話有賴太太嘅悉心傳授，囝囝嘅廚藝突飛猛進，除咗早排會炮製班戟，依家又話打算學整蟹鉗畀佢品嘗，Victor話只要講畀囝囝聽今晚想食乜嘢餸，佢就識得到街市購買相應嘅食材，睇嚟囝囝真係有烹飪天分。除咗玩煮飯仔，Victor近來又發覺自從太太買咗啲兒童實驗遊戲用品，囝囝就喺屋企玩實驗，將啲液體溝來溝去，睇吓會有咩化學作用。
同Victor同屬一個地區組織嘅公民力量主席潘國山，都話依家多咗時間返屋企食飯。問到佢會唔會乘機做個廿四孝老公，煮餐飯氹吓老婆開心，佢就好腼腆咁耍手擰頭，話自己煮飯唔叻，都係交畀老婆好啲。不過潘Sir都好識做，大讚老婆煮飯好食，平時仲最鍾意佢煮嘅梅菜蒸鯇魚添，又話呢碟餸係自己由細到大嘅最愛。
趙式浩BB性別賣關子
香港菁英會會員趙式浩（Howard）將喜事臨門，佢嘅未婚妻臨盆在即。儘管距離榮升第二任爸爸嘅日子不遠，但佢話新生命嘅性別暫時唔透露，話要保留神秘感喎。不過喺疫情之下待產，Howard坦言佢同未婚妻多少都有啲擔心，惟有講吓「多數偉人都喺亂世出生」之類嘅說話，聊博一粲。
卓妮