政情：發放正能量 黃偉鴻響應貼賽車相
近日賽車發燒友嘅圈子流行一種做法，就係倣效幾年前嘅「冰桶挑戰」，喺社交媒體張貼一幅自己參與賽車運動嘅相片，目的係宣揚正能量，以替代目前社會上嘅負面情緒。品牌發展局副主席黃偉鴻雖然係退役業餘賽車手，但佢日前亦都趁熱鬧，張貼自己去年喺內地某賽車場試車嘅英姿。
最後一戰奪亞軍 留美好回憶
講起賽車運動，黃偉鴻話只要做足安全措施，同遵守賽道上嘅規矩，遇到嘅風險未必高得過路面駕駛。不過，佢都明白家人嘅顧慮，所以十年前嘅澳門賽事，就係佢嘅業餘車手生涯最後一戰。雖然做唔到第一名衝線，但就得到亞軍，總算係留下一個唔錯嘅回憶。
告別刺激嘅賽車活動之後，佢惟有間中到內地賽車場試車，以解技癢。對於近期唔少體育競賽都因疫情而告吹，佢認為今年五、六月內地舉行嘅澳門賽車選拔賽，或因疫情而受阻，但只要唔爆發另一波疫情，佢相信今年年尾嘅澳門賽事可如期舉行。