中環出更：田北辰家中避疫 玩紋眉抽水
新冠肺炎疫情影響下，唔少人都留在家中避疫，議員田北辰（田二少）就話唔出街冇嘢做，決定拍片加入YouTube講政事，但有同事就同佢講入場門檻係要紋眉，點知田二少就真係貼上粗眉拍片，似乎係暗寸近期頻頻拍片發表政見、又啱啱走去紋眉嘅前深水埗區議員李梓敬喎。
疑似寸李梓敬 拍片講政見
田二少日前加入YouTube界，改名叫「與辰同行」，話會定期拍片分享時政睇法，等大家聽多啲唔同睇法。而佢第一條片就執過條眉先拍，應該係貼兩條道具粗眉至真，佢呼籲大家減少外出支持醫護，話自己冇嘢做會食吓外賣、睇吓書及打電話煩吓啲政府官員等，仲話每日幾十宗確診，但政府竟然hea過之前。
田仲引用專家袁國勇同何栢良說話，提醒市民千萬唔好「抗疫疲勞」，強調依家係「戰爭時期」，為醫護、為自己、為屋企應盡量減少社交活動，唔好出去聚集，好似佢一開完會就即刻返屋企o架！有網民見到，就搞笑問田二少條眉搞咗幾多錢，亦有人支持佢拍片，話可以專心玩抽水，覺得特別正喎。
卓妮