中環出更：漫畫誘人 羅文樂：愈禁愈想睇
好多人童年都係透過睇漫畫或者動畫，而獲得無窮歡樂。香港教育大學尋日就舉辦一個動漫作品展，目的係為初小學生提供趣學中文嘅多媒體教材，相信今時今日疫情嚴重嘅情況下，幫助唔少。其中動漫項目總監羅文樂（Lawman）就分享話自己細個喺學校為咗傳閱漫畫，同學之間會互相合作，用盡方法避開老師嘅法眼咁話。
中學時代就讀男校嘅Lawman憶起同學喺好奇心驅使下，會購買學校視為禁書嘅色情漫畫嚟睇。要做到一本漫畫就可以眾人享受，校園內嘅禁書收藏同傳遞，就要奇謀盡展。佢話有同學試過將本書捲好，用繩綁起並吊出課室窗外，成功逃過老師嘅法眼，可以話愈禁愈想睇。不過佢就好慶幸父母對漫畫並無太大限制，相對吸收嘅知識就會多啲。但Lawman提到香港欠缺發展動畫嘅風氣，反觀日本就做得非常好，就算一般嘅電視廣告都會加入動畫元素，實在值得學習。
「草日」同阿哥夾計避大人
著名漫畫家「草日」梁仲基都話自小就好鍾意睇漫畫，但無奈媽咪認為浪費金錢及時間，想睇漫畫就要諗計喇！草日話幸好佢哥哥當時係中學生，會用零用錢買漫畫書繼而收埋喺衫內，再偷運入房，或者擺喺屋外某個位置，通知草日趁大人唔喺屋企，就自行攞嚟偷睇。另外，昔日嘅飛髮舖為求小朋友正襟危坐，必定準備幾本漫畫，因此頻頻去剪頭髮，都係草日童年睇漫畫嘅一種途徑。
馮志弘嘆港動畫少新作
從事中文教育嘅教育大學文學及文化學系助理教授馮志弘，一有時間就會同太太去睇動畫。佢讚賞動畫題材喜歡描述理想世界，即使現實係有幾咁唔開心嘅事發生，但動畫依然會呈現美好同盼望嘅一面，不過就嫌粵語動畫數量較少兼以舊作居多，佢希望呢個情況將來會有所轉變。
卓妮