政情：工聯會口罩合格 優先派畀老人家
近排多間本地口罩廠開始投產，希望幫市民渡過無「罩」難關，其中工聯會上月中已開始生產口罩，仲寄埋樣品去美國做ASTM Level1嘅認證，話十四日內有結果，點知隔咗成個月，去到尋日先通過認證，唔通中間有阻滯？
作為工聯會口罩「廠長」嘅議員何啟明話因疫情嚴峻，口罩清關都等咗超過一個禮拜，加埋郵寄同十四日檢測時間，真係差唔多一個月，絕對唔係因為質量問題搞到遲咗喎。
有齊防水過濾吸水層
何啟明又同工聯會會長吳秋北拍咗條片，話要一層一層剝開口罩芯。睇真啲，原來個口罩有齊防水層、過濾層同吸水層，而且外層真係水沖都滲唔入。
唔知係咪因為早前被人懷疑啲口罩同由懲教署工業組（CSI）整嘅口罩太似，吳就專登車咗「工聯會」三個字上去，證明係自家製。何就話會優先將啲口罩派畀長者，等到全自動機投入運作後，會考慮攞半自動機嚟生產小童口罩。