政情：發展局開兩職位管工程 議員群起質疑
政府工程經常超支，要納稅人填氹，畀市民鬧爆後，發展局就成立咗項目成本管理辦事處去監控工程。話說發展局要求開設兩個職位領導項目策略及管控辦事處，以取代項目成本管理辦事處，但多名議員批評項目成本管理辦事處成效低同透明度低，質疑點解仲要加位？
兩個職位分別係一個首席政府工程師職位同一個政府工程師職位，由編外職位轉為常額職位，最後兩個職位都獲得通過。
被指成效差兼亂用人
但喺審議期間，議員鄺俊宇批評喺過去十年有成七十個工程項目超支，涉及超過六百億元開支，質疑點解有辦事處監管嘅情況下仲有超支。唔止講成效差，建築界議員謝偉銓就鬧爆政府未能用人唯才，話建築師同測量師都有專才，質疑點解兩個職位都只係工程師先做得。
發展局常任秘書長林世雄就回應話，編外職位因議案未通過而遭取消，所以工作由其他職位兼顧，只能營運有限度嘅工作，搞到設立策略性措施、採購等工作就做唔到。佢仲話目標雖然係零超支，但唔少項目嘅超支係喺工程早期發生，所以唔可以成為關鍵績效指標喎。