政情：拉布犯眾憎 專趕對頭人 郭榮鏗被轟濫權 偽君子

話說喺上星期嘅內會會議傾到超晒時，當財務委員會主席陳健波要求郭榮鏗交場時反被逐出會議室，惹起獨立建制派議員何君堯不滿，仲衝出主席台鬧爆郭榮鏗濫權添！當時Holden同象哥都有份和應何。其後郭再逐何出會議室，但喺保安未趕到人走時就結束會議，事後有議員批評保安雙重標準，仲去信立法會行政管理委員會投訴。

阻止提問 三度警告象哥

喺尋日再開內會時，郭榮鏗就話繼續傾番保安守則嘅事，當時有建制派議員不滿，認為同主席選舉無關。其中象哥就好勞氣咁提規程問題，講番上星期嘅會議，直斥郭當時係超時，冇權發號施令，但就畀郭反指唔係規程問題，三次警告佢唔好叫囂。

尋日行管會秘書以書面回應，話當時保安正努力執行郭嘅命令，但喺未完成命令時，會議已結束，仲話若委員會主席或會議主持人命令議員須離開會議室，保安會先向相關議員作口頭勸喻，仲會因應當時嘅實際情況作判斷同埋採取適當行動。

但呢個回應就引起民主派不滿，批評保安雙重標準，指過去其他委員會主席逐民主派議員離場，保安就會以快、狠、準嘅態度，以大量人手將佢哋抬離場，質疑保安喺上星期會議係咪身體不好抑或係雙手無力。

建制忍無可忍 終大爆發

之後Holden發言唔單止鬧爆郭榮鏗越權，認為保安爭議應該喺行管會上討論，仲批評佢要求象哥唔好發言時個樣兇神惡煞、唯我獨尊，直斥「話你真小人都便宜咗你，你係偽君子呀郭榮鏗！」

話時話，民主派經常拉布，搞到民生議案都審議唔到，已令建制派好不滿，屈得耐終於大爆發，好似工聯會嘅議員麥美娟日前大鬧民主派係契弟，Holden依家更直斥郭榮鏗係偽君子，睇嚟會愈鬧愈激喎。