中環出更：被封自拍王 陳百里隔一年先解畫
政府自二○○八年起開設副局長同政治助理職位，但多次被外界批評質素參差，人工過高但職責唔清唔楚。有議員舊年就冇點名批評某副局長「淨識自拍、唔識政策」，咁啱商務及經濟發展局副局長陳百里（Bernard）自嗰日後就畀網民改咗個花名叫「自拍王」，點知隔咗成年，Bernard尋日先為自己「平反」，話攝影原來唔係佢興趣喎。
議員麥美娟舊年開會時話，有啲副局長積極出席活動兼成日玩自拍，寸爆問政府訓練係咪包埋自拍喎。咁啱Bernard仲係商務及經濟發展局政治助理嗰陣，成日都攞住部傻瓜相機，捕足老闆出席活動時嘅一顰一笑，加上畀人話好鍾意自拍，令外界都以為佢嘅興趣係影相。
話自己興趣係彈琴
尋日喺一個活動上見到Bernard，問佢有乜嘢嗜好？佢竟然話唔係攝影，係彈琴，仲由四歲彈到依家，又話雖然無去考鋼琴評級試，但兩個女都好鍾意聽o架，尤其喊緊嘅細女聽到佢嘅琴聲就笑番晒添！
Bernard又為自己「平反」，話有時出席啲社區團體同商會嘅聚會，影番張相都好正常，自己亦無諗做攝影師咁話。唔知一眾議員接唔接受咁嘅解釋呢？
卓妮