中環出更：官員開會仍拒戴罩議員鬧爆
新冠肺炎全球大爆發，呢幾日香港嘅確診個案亦急增，政府呼籲市民唔好對防疫鬆懈，但班官似乎唔係咁「響應」，去立法會開會時唔戴口罩，唔通限罩令未解封？
話說財委會尋日朝早開會，與會嘅發展局常任秘書長林世雄冇戴口罩，而坐喺佢隔籬嘅首席政府工程師（項目）鄺家陞有戴，仲間中除低抖吓氣，而喺下晝嘅財委會會議，商務及經濟發展局局長邱騰華同香港按揭證券有限公司執行董事兼總裁李令翔，喺會議頭兩個幾鐘都無戴口罩回應議員質詢，直到財委會主席陳健波話會議休息一陣嗰時，終於有議員忍唔住開咪話佢哋唔戴口罩。
徐英偉一個口罩用一個月
議員覺得會議室入面嘅枱個個都可以坐，但唔係個個都會喺離開前消毒乾淨，又呻會議室內各人只有三尺距離，覺得大家最好做足個人防疫措施，又點名另一議員郭偉強無戴罩，仲話見到同場其他嘉賓代表隻手不時摸完枱又摸面，希望大家可以互相保護喇！
又係嘅，班議員同官員喺議事廳係咁噴口水，真係好高危o架！好似勞工及福利局副局長徐英偉（Caspar）就做到足，仲戴住一個與別不同嘅口罩添！Caspar解釋話呢個係重用口罩嚟o架，因為眼見依家一罩難求，不如索性就重用口罩咁話，仲話呢一隻用咗一個月左右。聽到嚇一嚇，但佢話晚晚都會返去清洗乾淨o架！由於係重用口罩，所以佢都買咗塊夏天用嘅冰巾隔住啫！
究竟點樣清潔個口罩？佢就話特登買咗個人哋用嚟消毒奶樽嘅機嚟洗，一洗完就會拎個口罩去消毒喎。唔單止佢用o架，連佢老婆、阿仔都有用，仲話懲教署工業組（CSI）生產嘅口罩自己就冇用到喇，要留番畀同事用喎。
卓妮