政情：鄺俊宇唔戴罩鬧官員
新冠肺炎持續咗一段時間，立法會最近都開始復番會，最初班議員開會都長戴口罩，但呢排都開始鬆懈，議員鄺俊宇（Roy）尋日仲喺大會上冇戴口罩咁鬧啲官，分分鐘影響到附近啲議員喎。
話嬲到要飲水 趕唔切戴回
話說阿Roy尋日喺會上不滿政府回應，喺發言時仲情緒激動咁鬧官員，而當時佢係冇戴口罩，但去到下晝就戴番口罩喇！問番佢點解唔戴口罩，佢解釋當時聽到官員回應就好嬲，所以即刻除口罩飲水冷靜吓，點知就咁啱輪到佢發言，所以就趕唔切戴番口罩先發言喇。
講開又講，元朗區議會副主席麥業成嘅長子確診新冠肺炎，而麥業成近日亦有繼續開會，部分元朗區議員都話會自我隔離喇，但身兼元朗區議員嘅阿Roy竟然仲返立法會。佢話尋日冇返區議會開會，亦唔係「文、藝、康、體、福利、教育及治安委員會」嘅委員，所以就唔使自我隔離，但佢都話如果有同確診者接觸的話，都會自我隔離番。